کمالِ تَرک نہیں آب و گِل سے مہجوری کمالِ ترک ہے تسخیرِ خاکی و نوری
مَیں ایسے فقر سے اے اہلِ حلقہ باز آیا تمھارا فقر ہے بے دَولتی و رنجوری
نہ فقر کے لیے موزُوں، نہ سلطنت کے لیے وہ قوم جس نے گنّوایا متاعِ تیموری
سُنے نہ ساقیِ مہ‌وَش تو اور بھی اچھّا عیارِ گرمیِ صُحبت ہے حرفِ معذوری
حکیم و عارف و صُوفی، تمام مستِ ظہور کسے خبر کہ تجلّی ہے عین مستوری
وہ مُلتفت ہوں تو کُنجِ قفَس بھی آزادی نہ ہوں تو صحنِ چمن بھی مقامِ مجبوری
بُرا نہ مان، ذرا آزما کے دیکھ اسے فرنگ دل کی خرابی، خرد کی معموری